انا مااشتكيت لي زول (شعر)

انا ما اشتكيت لي زول خلوني عزابي
ايه يعني عشت وحيد بين امي واصحابي
ما دام برايا سعيد وقافل علي بابي
لا ريدة لا شاكوش لا زول اكون حابي ** **
انا ما اشتكيت لي زول خلوني عزابي!!
********
ماياما ضقنا الويل نزل الدمع رقراق
وياما سهرنا الليل نتبكي للعشاق
قاسينا جور الريد ومرارة الاشواق
شن فايدة الإحساس ما دام نهايتو فراق
********
الزول بريد الزول امنيتو اسرة وبيت
احساس جميل ولطيف ياما وراهو مشيت
لكن لقيتو سراب وبقيت اقول ياريت
زي ما عرفت الحب او ما حصل حبيت
********
انا مالي مااااال الهم زعلان وراضيتو
ما دق لي تلفون وما جاني لاقيتو
شايفاهو في الواتساب يومداك باريتو
اخر ظهور بالليل وخلاني خليتو
********
الوالدة طول اليوم يا ولدي قوم عرس
والخالة والعمات حبوبة بتحنس
قايلني شان فلسان حردان ومنجرس
وانا في الحقيقة رضيت بي قسمتي معنس
********
الناس تعاين ليك اها لسة ما قرب
ما سوي ليهو دريب ما اختار ولا درب
كمين سؤال وجواب يوماتي تتكرب
ما مالي عينك زول ومالك بتتهرب
******
ماديل بنات اهلك وديلك من الجيران
اخلاق وذوق وعفاف والقامة زي البان
كان قلت خير يللاك ندخل علي الديوان
اصلو العرس بنتم وما مشكلة الصيوان
*******
ياناس وحات الله القصة مافي الجيب
القسمة لما تتم مكتوبة ليك في الغيب
القصة في الاحساس لو جاب مظنة وريب
وفي زول عشقتو شديد بس ياخسارة وعيب
*******